Створаны новы альянс Паўночная група – Украіна, у які ўвойдуць краіны Скандынавіі, Балтыі і Паўночнай Еўропы

• 20.11.2024, 21:29

12 краінаў аб'ядноўваюцца для ўмацавання бяспекі і падтрымкі Украіны.

12 краінаў аб'ядноўваюцца для ўмацавання бяспекі і падтрымкі Украіны ў альянсе Паўночная група – Украіна.

Пра гэта паведаміў міністр абароны Украіны Рустэм Умераў.

«Новыя альянсы падтрымкі Украіны. Пашыраем далягляды: запускаем супрацоўніцтва ў рамках Паўночная група – Украіна», – адзначыў Умераў.

У яго ўвойдуць 12 краінаў.

Нардычныя дзяржавы: Данія, Швэцыя, Фінляндыя, Нарвегія, Ісландыя.

Краіны Балтыі: Эстонія, Латвія, Літва.

А таксама Нямеччына, Нідэрланды, Польшча і Вялікая Брытанія.

«Сёння была першая сустрэча ў такім фармаце. Удзячны майму сябру, міністру абароны Даніі, за лідарства і гасціннасць. Дамовіліся, што наступнае паседжанне ў фармаце Паўночная група – Украіна правядзем ва Украіне. Мелі адкрытую, шчырую і канструктыўную размову з калегамі», – напісаў міністр абароны.

Удзельнікі сустрэчы абмеркавалі планы на 2025 год, надзённыя патрэбы Украіны і як разам іх забяспечыць максімальна хутка.

Сфакусаваліся на агульных пагрозах, а таксама аснашчэнні баявых брыгадаў цяжкай тэхнікай.

Паводле словаў Умерава, інвестыцыі ва ўкраінскі АПК – асобны прыярытэт. Усё больш краінаў далучаюцца да фінансавання ўкраінскай вытворчасці, у тым ліку і ў рамках дацкай мадэлі: Швэцыя, Нарвегія, Літва.

Таксама ён падзякаваў хаўруснікам за дапамогу, якую яны прапануюць.

Гэтыя краіны – лідары ў падтрымцы Украіны. Яны першымі:

далі асноўныя баявыя танкі заходняга ўзору;

перадалі дальнабойныя боепрыпасы для нанясення ўдараў у тыле ворага;

забяспечылі дальнабойныя сістэмы СПА;

падтрымалі Украіну ў фінансаванні абароннай прамысловасці;

перадалі знішчальнікі F-16.