Якую інфармацыю пра беларусаў не могуць выдаваць адвакаты?

• 23.11.2024, 13:17

Юрысты далі спіс з пяці пунктаў.

У Менскай гарадской калегіі адвакатаў агучылі спіс звестак, якія, згодна з беларускім заканадаўствам, падпадаюць пад паняцце адвакацкай таямніцы. Такую інфармацыю, атрыманую ад кліентаў, адвакаты не маюць права выдаваць іншым асобам без ягонага дазволу, у тым ліку – суду.

Пад адвакацкай таямніцай разумеюцца звесткі пра кліента, якія чалавек сам паведамляе свайму адвакату і разгалашэнне якіх будзе супярэчыць інтарэсам гэтага чалавека.

У Беларусі абавязак захавання гэтай таямніцы прапісаны ў Правілах прафесійнай этыкі адваката, зацверджаных пастановай Міністэрства юстыцыі, піша «Тэлеграф».

Адвакатка Наталля Анюхоўская, сябра рады маладых адвакатаў Менскай гарадской калегіі, агучыла спіс, на што распаўсюджваюцца правілы захавання адвакацкай таямніцы ў Беларусі:

звесткі ў пытаннях, з якімі кліент звярнуўся па юрыдычную дапамогу;

сутнасць даведак, кансультацый, атрыманых кліентам ад адваката;

звесткі пра асабістае жыццё кліента;

звесткі, якія складаюць камерцыйную таямніцу кліента;

атрыманая ад кліента інфармацыя пра абставіны ўчынення злачынства паводле крымінальнай справы, у якой адвакат ажыццяўляў абарону правоў, свабодаў і інтарэсаў кліента.