Яркі кінагерой: На аўкцыён выставілі спартовае аўто знакамітага шпіёна

• 23.11.2024, 14:37

Кабрыялет Jaguar 1967 года размаляваны ў колеры брытанскага сцяга.

У ЗША на аўкцыён Mecum выставілі кабрыялет Jaguar E-Type 1967 года. За яго плануюць атрымаць немалыя грошы, бо ён з'яўляецца кінагероем. Пра аўтамабіль расказалі на сайце аўкцыёну.

Менавіта гэты Jaguar E-Type Series 1 у колерах брытанскага сцяга здымаўся ў камедыйнай кінатрылогіі пра шпіёна Осціна Паўэрса. Характэрна, што ва ўсіх трох фільмах для здымак выкарыстоўвалі адно-адзінае аўта – у яго не было машынаў-дублерак.

Акрамя таго, Jaguar E-Type (або Shaguar, як яго называў Осцін Паўэрс) зняўся ў кліпе Мадонны на песню Beautiful Stranger, якая стала саўндтрэкам да другой часткі трылогіі.

Пасля здымак спарткар Jaguar E-Type выкупіў прыватны калекцыянер. Часам аўто ўдзельнічала ў промаакцыях Jaguar. Нядаўна яно прайшло рэстаўрацыю, а ягоны прабег складае 103000 км.

Кабрыялет Jaguar E-Type 1967 года абсталяваны 4,2-літровай раднай шасцёркай на 265 к.с. і 4-ступеністай механічнай КПП. Ён здольны разагнацца да 100 км/г за 7 сек і развіць 240 км/г.