У Віцебску ўсталююць самую вялікую ў Еўропе навагоднюю ялінку?

• 23.11.2024, 17:02

Вышыня ялінкі будзе 33,5 метра.

У Віцебску на гэтыя навагоднія святы маюць намер устанавіць рэкорд. Як сцвярджае дзяржаўная ТВ, тут усталёўваюць самую вялікую не толькі ў Беларусі, але і ва ўсёй Еўропе ялінку, сабраную з сапраўдных дрэў.

Вышыня ялінкі будзе 33,5 метра, і яна мае асаблівую канструкцыю. Для яе зборкі выкарыстоўваюць елкі вышынёй ад метра, якія супрацоўнікі прадпрыемства "Віцебскі зялёнбуд" спецыяльна шукаюць у розных лясгасах. Над устаноўкай навагодняга сімвала працуе брыгада з васьмі чалавек.

Да пачатку снежня на віцебскай ялінцы будуць свяціцца гірлянды з мноствам упрыгожванняў, дэкарацыі і сучасная ілюмінацыя хутка з'явіцца і на вуліцах горада.