FT: Расея вярбуе еменскіх хусітаў на вайну супраць Украіны

• 24.11.2024, 11:46

Мужчын прывезлі ў РФ па канале гандлю людзьмі

Расея вярбуе сотні еменскіх хусітаў на вайну супраць Украіны. Мужчын прывезлі ў РФ праз ценявую аперацыю па гандлі людзьмі.

Пра гэта паведамляе Financial Times.

Еменскія навабранцы, якія ездзілі ў Расею, распавялі Financial Times, што ім абяцалі высокааплатную працу і нават расейскае грамадзянства. Калі яны прыехалі ў РФ, іх прымусова набралі ў расейскае войска і адправілі на лінію фронту ва Украіну.

Амерыканскія дыпламаты гавораць, што пагадненне паміж Крамлём і хусітамі - прыкмета таго, як далёка гатова зайсці Расея.

Са слоў аналітыкаў, нямногія хусіты прайшлі падрыхтоўку ў Расеі, нягледзячы на тое, што Емен - бедная краіна і добра падыходзіць для вярбоўкі наймітаў.

У кантрактах еменцаў, з якімі азнаёмілася FT, была пазначаная кампанія, заснаваная вядомым палітыкам-хусітам Абдулвалі Абдо Хасанам аль-Джабры. Рэгістрацыйныя дакументы паказваюць кампанію як тураператара і пастаўшчыка раздробнага медыцынскага абсталявання і фармацэўтычных прэпаратаў.

Паводле выдання, вярбоўка наймітаў пачалася яшчэ ў ліпені. Адзін з кантрактаў быў датаваны 3 ліпеня і падпісаны начальнікам цэнтра адбору кантрактнікаў у Ніжнім Ноўгарадзе.

FT перапісвалася з адным з наймітаў у Расеі. Ён выказаў меркаванне, што ўваходзіў у групу з блізу 200 еменцаў, якіх набралі ў расейскае войска ў верасні. Мужчына распавёў, што яго прывабілі ў Расею абяцаннямі аб прыбытковай працы ў сферы «бяспекі» і «інжынерыі».

Праз некалькі тыдняў на фронце ён уцёк разам з чатырма нядаўна прыбылымі еменцамі ў лесе ва Украіне. Са слоў найміта, адзін з мужчын спрабаваў скончыць жыццё самагубствам і быў дастаўлены ў лякарню.