WhatsApp цяпер можа ператварыць галасавыя паведамленні ў тэкст

• 24.11.2024, 20:23

Задарма.

Кампанія Meta анансавала стэнаграмы галасавых паведамленняў у WhatsApp. Канкурэнты даўно прапануюць гэты інструмент, але часцяком — за дадатковую плату.

Калі Вы знаходзіцеся ў тлумным месцы або проста не хочаце слухаць доўгае галасавое паведамленне, вельмі карыснай можа быць функцыя аўтаматычнага пераводу галасавога паведамлення ў тэкст. Новая функцыя WhatsApp дазваляе рабіць гэта з апрацоўкай змесціва беспасярэдне на прыладзе, што робіць немагчымым перадачу звестак камусьці яшчэ.

Каб выкарыстоўваць функцыю, неабходна ўвамкнуць яе ў наладах (раздзел "Размовы" > "стэнаграмы галасавых паведамленняў"), выбраўшы мову транскрыпцыі. Каб перавесці ў тэкст пэўнае паведамленне, дастаткова доўга націскаць на яго і закрануць кнопкі «транскрыбаваць».

Meta паведамляе ў блогу, што гэтая функцыя пачне разгортвацца ва ўсім свеце на працягу наступных тыдняў. Іншыя мэсэнджэры даволі працяглы час прапануюць гэтую функцыю. У Telegram функцыя пераводу галасавога паведамлення ў тэкст доўгі час была даступная толькі для ўладальнікаў платнай падпіскі. Цяпер абмежаваны доступ да яе маюць усе карыстальнікі мэсэнджэра.