Зяленскі заклікаў партнёраў даць Украіне СПА для абароны ад ракет тыпу «Арэшнік»

• 24.11.2024, 21:58

Прэзідэнт Украіны запісаў відэазварот.

У відэазвароце прэзідэнт Украіны Уладзімір Зяленскі заклікаў партнёраў забяспечыць Украіну сістэмамі СПА, здольнымі абараняць ад удараў ракетамі тыпу «Арэшнік»

Як інфармуе Цензор.НЕТ, відэа было апублікаванае ў тэлеграм-канале кіраўніка дзяржавы.

«Сёння Служба бяспекі Украіны, Міністэрства ўнутраных спраў паказалі інфармацыйным агенцтвам абломкі расейскай ракеты, якая ўдарыла па нашым Дняпры. Зараз працягваюцца экспэртызы, праца з партнёрамі для выяўлення ўсіх дэталяў і ўсіх характарыстык аб гэтай ракеце. І каб разам знайсці адказ на гэты расейскі эскалацыйны крок.

Свет мае сістэмы супрацьпаветранай абароны, здольныя абараняць і ад такога. Трэба на гэтым засяродзіцца ўсім. Расея павінна адчуваць, што кожны яе крок на пашырэнне вайны мае для яе наступствы.

Наступствы – у нашых дзеяннях на фронце, нашых ваяроў, нашых падраздзяленняў. А таксама — наступствы ў дзеяннях свету. Як свет адказвае. Нельга даваць Пуціну ніводнага тыдня, каб адаптавацца і знайсці процідзеянне. Трэба ўвесь час рабіць усё, каб Расея была вымушаная шукаць магчымасць міру. Сапраўднага міру. І гэта дасягаецца толькі двума рэчамі – дапамогай Украіне і ціскам на Расею. Дзякуй усім у свеце, хто менавіта так робіць, хто – з намі, з Украінай, з украінцамі! Дзякуй усім нашым людзям, якія ваююць, працуюць дзеля Украіны!", – сказаў Зяленскі.