У Беларусь з Польшчы ссоўваюцца атмасферныя франты

• 25.11.2024, 17:54

Гэта адаб'ецца на надвор'і на гэтым тыдні.

26 лістапада надвор'е ў Беларусі ў асноўным будзе вызначаць вобласць падвышанага атмасфернага ціску. Чакаецца воблачнае з праясненнямі надвор'е. Пераважна без ападкаў. Уночы і раніцай месцамі прагназуюцца слабыя туман і галалёд. На асобных адцінках дарог галалёдзіца. Вецер паўднёвы, паўднёва-ўсходні сярэдні, месцамі парывісты.

Тэмпература паветра мінімальная ўночы -4..+2°С, па паўднёвым усходзе краіны да -6°С, максімальная ўдзень будзе ад -1°С па ўсходзе да + 8°С па паўднёвым захадзе. Атмасферны ціск будзе слаба падаць.

27 лістапада варункі надвор'я будзе вызначаць франтальны раздзел, які змяшчаецца з Заходняй Еўропы. На большай частцы тэрыторыі краіны пройдуць кароткачасовыя ападкі (мокры снег, дождж). У асобных раёнах чакаюцца слабыя туман і галалёд.

На дарогах месцамі галалёдзіца. Вецер паўднёвы з пераходам на заходні сярэдні, месцамі парывісты. Тэмпература паветра мінімальная ўночы -4..+3°С, па паўднёвым усходзе краіны паветра астудзіцца да -8°С, максімальная ўдзень складзе ад -2°С па паўднёвым усходзе да +6°С па паўднёвым захадзе Беларусі.

28 лістапада ўначы адаб'ецца ўплыў няўстойлівай паветранай масы, удзень надвор'е будуць фармаваць атмасферныя франты, якія змяшчаюцца з тэрыторыі Польшчы. Ноччу месцамі, удзень на большай частцы тэрыторыі краіны пройдуць кароткачасовыя ападкі (мокры снег, дождж).

У асобных раёнах чакаюцца слабыя туман і галалёд, на дарогах галалёдзіца. Вецер паўднёвай чвэрці сярэдні, удзень месцамі на захадзе парывісты. Тэмпература паветра мінімальная ўночы -4..+ 3°С, максімальная ўдзень -1..+ 5°С.