Bloomberg: палітыка Трампа можа знізіць некаторыя валюты

• 25.11.2024, 18:48

Асноўны ўдар прыйдзецца на кітайскі юань.

Экспэрты Bank of America мяркуюць, што інвестары недаацэньваюць рызыкі гандлёвай вайны пры прэзідэнцтве Дональда Трампа. Яны прагназуюць 5% падзенне валют рынкаў, якія развіваюцца, у першай палове 2025 года.

Выданне Bloomberg піша, што асноўны ўдар прыпадзе на кітайскі юань. У першай палове наступнага года кітайская валюта ўпадзе да 7,6 юаня за даляр, калі адміністрацыя Трампа ўвядзе 40% мыты на кітайскія тавары. Пры гэтым 60% мыты прывядуць да зніжэння курсу юаня да 8 за даляр у параўнанні з бягучым узроўнем 7,24.

Індэкс MSCI-фондавы індэкс, які паказвае сітуацыю на сусветным фондавым рынку - для валют рынкаў, якія развіваюцца, аслабеў прыкладна на 1% з тых часоў, як Трамп забяспечыў сваё вяртанне ў Белы дом, на фоне боязі ўвядзення дадатковых гандлёвых мытаў і эскалацыі вайны ва Украіне. Больш за ўсё пацярпелі валюты Усходняй Еўропы.

На думку экспэртаў, цяпер лепш купляць даляр, а не валюты рынкаў, якія развіваюцца, асабліва гэта тычыцца юаня і паўднёваафрыканскага ранда. Яны таксама звярнулі ўвагу на мясцовыя аблігацыі Бразіліі, Вугоршчыны, Польшчы і Турцыі, але стратэгі раяць чакаць піка даляра ў пачатку 2025 года.