Зяленскі правёў Стаўку

• 25.11.2024, 20:06

Што абмяркоўвалі.

Прэзідэнт Украіны Уладзімір Зяленскі ў панядзелак, 25 лістапада, правёў Стаўку вярхоўнага галоўнага камандзіра. Тэмай было аднаўленне інфраструктуры Украіны пасля нападу 17 лістапада.

Пра гэта паведамляе Telegram-канал прэзідэнта Украіны.

Паводле словаў Зяленскага, на Стаўцы ён заслухаў даклад ад прадстаўнікоў Міністэрства энэргетыкі, «Нафтагаза» і ўсіх ключавых удзельнікаў галіны.

«Гаварылі пра ход аднаўлення пасля расейскіх абстрэлаў 17 лістапада і далейшую абарону ўсіх крытычных аб'ектаў», – расказаў Зяленскі.

Ён таксама расказаў, што абмяркоўвалася пытанне газавай інфраструктуры і генерацыі – атамнай, гідра- і цеплавой. Было абмеркаванае пытанне, каб павялічыць магчымасці для імпарту электраэнэргіі ва Украіну.

«Быў даклад Паветраных сілаў пра прыкрыццё аб'ектаў крытычнай інфраструктуры з неба. Мы бярэм самы эфектыўны досвед эшаланавання сродкаў СПА і распаўсюджваем яго на іншыя рэгіёны», – напісаў Зяленскі.

Прэзідэнт Украіны адзначыў, што на Стаўцы быў таксама даклад Міністэрства абароны датычна кантрактавання і авансавання для ўкраінскіх вытворцаў зброі, снарадаў, ракетаў, дронаў.