Зімовыя вакацыі ў школьнікаў пачнуцца не з панядзелка

• 25.11.2024, 21:07

Але адпачываць дзеці ўсё роўна будуць два тыдні.

Беларускія школьнікі ў 2024/25 навучальным годзе на зімовыя вакацыі пойдуць з сярэдзіны тыдня, зазначыў 1prof.by.

Другая чвэрць у школах і гімназіях традыцыйна ўважаецца за самую маленькую – толькі шэсць з паловай тыдняў.

Бацькі памятаюць, што пачалася яна не вельмі зручна – у панядзелак, 4 лістапада, а ўжо ў чацвер усе сышлі на доўгія выходныя.

На гэты раз чвэрць скончыцца на каталіцкія Каляды. Першы дзень вакацыяў – 25 снежня 2024 года.

Заканчваецца адпачынак таксама разам са святам, але ўжо праваслаўным. Адразу пасля яго, 8 студзеня 2025-га, школьнікі вернуцца за свае парты на самую доўгую чвэрць года. Але не ўсё.

Нагадаем, што для вучняў першых, другіх і трэціх (для дзетак з асаблівасцямі псіхафізічнага развіцця з пяцігадовым тэрмінам навучання на I ступені агульнай сярэдняй адукацыі) класаў новую чвэрць разаб'юць напалам дадатковымі зімовымі вакацыямі.

Маляняты таксама будуць адпачываць з 17 да 23 лютага 2025-га.