Жыхароў Гомельшчыны масава выклікаюць у пракуратуру

• 26.11.2024, 10:32

Людзей прымушаюць падпісваць спецыяльныя дакументы.

Жыхароў Гомельскай вобласці, якія нейкім чынам "засвяціліся" як палітычна актыўныя, масава выклікаюць у пракуратуру.

Гэта тыя, каго судзілі паводле крымінальных ці адміністрацыйных артыкулаў за ўдзел у пратэстах супраць фальсіфікацыі выбараў 2020 года, за падпіскі на рэсурсы, абвешчаныя «экстрэмісцкімі», піша «Флагшток».

Акрамя таго, вядома аб выпадках, калі такія выклікі ў пракуратуру атрымлівалі тыя, хто мае шмат штрафаў ад ДАІ.

Людзей прымушаюць падпісваць папярэджанні аб недапушчальнасці парушэння КК і КоАП, абавязацельствы не парушаць грамадскі парадак.

Выклікі адбываюцца праз позву ці праз тэлефонны званок. Аднак актывісты адзначаюць, што турбавацца не варта — гэта толькі фармальная працэдура, якую сілавікі разглядаюць як «прафілактычную акцыю».

Аналагічную працэдуру прымушалі праходзіць актывістаў і напярэдадні выбараў 2020 года.