У Брытаніі зноў заўважылі дроны над авіябазамі, якімі карыстаюцца ВПС ЗША

• 26.11.2024, 21:00

Невядомыя дроны лётаюць ужо некалькі дзён запар.

Невядомыя беспілотнікі былі прыкмечаныя над трыма базамі ваенна-паветраных сілаў Злучаных Штатаў Амерыкі ў Вялікай Брытаніі. Яны лёталі там цягам 6 дзён.

Пра гэта паведамляе Reuters.

Паводле звестак агенцтва, за апошнія шэсць дзён над трыма базамі Ваенна-паветраных сілаў ЗША ў Англіі было заўважана некалькі невядомых беспілотнікаў.

«Невялікія беспілотныя лётныя апараты былі заўважаныя паблізу і над базамі RAF Лейкенхіт, RAF Мілдэнхол і RAF Фелтвел ў перыяд з 20 да 26 лістапада», – заявіла крыніца Reuters.

Варта заўважыць, што гэтыя тры базы, дзве ў Сафалку і адна ў Норфалку, арандуюцца Злучанымі Штатамі ў Вялікай Брытаніі.

Прадстаўнік Міністэрства абароны Вялікай Брытаніі заявіў, што яны «сур'ёзна ставяцца да пагрозаў і падтрымліваюць надзейныя захады» на абаронных аб'ектах.

«Мы падтрымліваем адказ ВПС ЗША», – дадаў спікер.

Таксама вядома, што брытанскія войскі былі задзейнічаныя для дапамогі ВПС ЗША, высветліць, хто нясе адказнасць за палёты беспілотнікаў над іх базамі.