У Беларусі забаранілі расейскія рыбныя палачкі і бургеры

• 27.11.2024, 17:38

У іх знайшлі патагенныя мікраарганізмы.

У беларускіх крамах знайшлі рыбныя паўфабрыкаты, небяспечныя для здароўя, паведамляе Дзяржстандарт.

Праблемная прадукцыя - замарожаныя бургеры і палачкі, вырабленыя ТАА «ПАЛАР СІФУД РАША» ў Калужскай вобласці. Імпартам займалася ЗАТ «Дабраном».

Згодна са звесткамі Дзяржстандарта, гэтыя тавары парушаюць патрабаванні тэхнічных рэгламентаў Мытнага і Еўразійскага эканамічных саюзаў. У прадукцыі выявілі бактэрыі групы кішачнай палачкі і небяспечныя мікраарганізмы, у тым ліку сальманэлу.

22 лістапада было выдадзена прадпісанне выключыць паўфабрыкаты з продажу. Да 29 лістапада ўся небяспечная прадукцыя павінна знікнуць з паліц крамаў.