Еўрапарламент адмовіўся прызнаваць выбары ў Грузіі

• 28.11.2024, 16:26

І заклікаў правесці паўторныя.

Еўрапейскі парламент з прычыны значных парушэнняў не прызнаў вынікі парламенцкіх выбараў у Грузіі.

Пра гэта паведамляе прэс-служба Еўрапарламента.

Адзначаецца, што ў чацвер, 28 лістапада, Еўрапейскі парламент прыняў рэзалюцыю, у якой асудзіў парламенцкія выбары ў Грузіі, краіне-кандыдатцы на ўступленне ў ЕЗ за тое, што яны не былі ні свабоднымі, ні справядлівымі.

«Дэпутаты Еўрапарламента асуджаюць шматлікія і сур'ёзныя парушэнні на выбарах, уключаючы задакументаваныя выпадкі запалохвання выбарцаў, маніпуляванне галасаваннем, умяшанне ў працу назіральнікаў за выбарамі і СМІ, а таксама паведамленні аб маніпуляцыях з выкарыстаннем электронных машын для галасавання», — гаворыцца ў паведамленні.

Еўрапарламент зазначае, што вынікі галасавання «не з'яўляюцца надзейным адлюстраваннем волі грузінскага народа», і зняпраўджвае ўсякае прызнанне парламенцкіх выбараў у выніку. Еўрадэпутаты хочуць, каб выбары адбыліся паўторна цягам года пад дасканалым міжнародным наглядам і незалежнай выбарчай адміністрацыяй.

Парламент таксама рашуча асуджае сістэматычнае ўмяшанне Расеі ў дэмакратычныя працэсы ў Грузіі праз дэзінфармацыю. Дэпутаты Еўрапарламента сур'ёзна папярэджваюць грузінскія ўлады аб тым, што ўсе спробы забараніць законна створаныя палітычныя партыі яшчэ больш адштурхнуць краіну ад ЕЗ і зробяць немагчымымі ўсе крокі да ўступлення ў ЕЗ. Яны таксама кажуць, што палітыка «Грузінскай мары» несумяшчальная з еўраатлантычнай інтэграцыяй Грузіі.