Хакеры абрабавалі Цэнтральны банк Уганды

• 28.11.2024, 20:42

Выкралі мільёны даляраў.

Хакеры ўзламалі сістэмы кіберабароны Цэнтральнага банка Уганды і выкралі з яго рахункаў 62 млрд шылінгаў ($ 17 млн). Пра гэта паведамляе агенцтва Bloomberg.

Напад на Банк Уганды быў учынены групай, вядомай як Waste, якая базуецца ў Паўднёва-Усходняй Азіі, паведаміла мясцовая газета са спасылкай на свае крыніцы. Выданне таксама ўказала, што банку ўдалося вярнуць блізу 37 млрд шылінгаў з выкрадзеных грошай.

Паводле версіі іншай мясцовай газеты, Цэнтрабанк быў абрабаваны яшчэ ў верасні, а грошы былі таемна выведзеныя на два рахункі ў Японіі і Вялікай Брытаніі.

Таксама паведамляецца, што суўдзельнікамі злачынства могуць быць супрацоўнікі Цэнтрабанка. Падчас расследаванняў былі дапытаныя некалькі службоўцаў Цэнтральнага банка і Міністэрства фінансаў.