На Віцебшчыне адбылося страшнае ДТЗ з фурай і легкавіком

• 29.11.2024, 12:20

Двое загінулых.

Раніцай 29 лістапада ў Талачынскім раёне здарылася страшнае ДТЗ. Пра здарэнне паведамляе Telegram-канал “МУС Беларусі".

На 503-м кіламетры аўтадарогі М – 1 Берасце – Менск-мяжа РФ легкавік сутыкнуўся з фурай.

У ДАІ паведамілі падрабязнасці:

"54-гадовы кіроўца Volkswagen, паводле папярэдняй інфармацыі, заснуў за стырном і ўчыніў спадарожнае сутыкненне з паўпрычэпам аўтацягніка ў складзе з цягачом Mercedes».

У аварыі загінулі два пасажыры легкавіка 44-гадовая жанчына і яе 21-гадовы сын.

Супрацоўнікі інспекцыі нагадваюць, што кіраваць транспартным сродкам у хваравітым або стомленым стане, які ставіць пад пагрозу бяспеку дарожнага руху, забаронена.