Палякі падтрымліваюць павелічэнне выдаткаў на абарону краіны

• 29.11.2024, 16:23

«За» выступаюць 72,9%.

Большасць палякаў згодныя з павелічэннем выдаткаў на развіццё войска.

Аб гэтым сведчаць вынікі апытання IBRiS для газеты Rzeczpospolita.

Так, 72,9% апытаных выступаюць за павелічэнне выдаткаў на абарону Польшчы, толькі 18,2% - супраць, а 9% не маюць меркавання з гэтай нагоды.

Rzeczpospolita адзначае, што грамадская падтрымка павелічэння выдаткаў на абарону ў краіне з'яўляецца стабільнай: у красавіку 2022 года ажно 76,7 адсотка рэспандэнтаў ухвалялі гэтыя захады.

«Толькі 12,1% мелі супрацьлеглае меркаванне, і прыкладна столькі ж рэспандэнтаў (11,3%) не мелі меркавання. Такім чынам, можна ўбачыць, што за 31 месяц толькі нязначна (на 3,8 пункта) зменшылася колькасць тых, хто ўхваляе павелічэнне выдаткаў на ўзбраенне», - тлумачыць газета.

Выданне зазначае, што выдаткі на нацыянальную абарону паступова растуць з пачатку агрэсіі Расеі супраць Украіны, гэта значыць, ужо амаль тры гады.