У беларускае войска выпраўляюць падробку пад Starlink, праз якую быў высмеяны Лукашэнка

• 30.11.2024, 11:25

Выраб абяцаюць да снежня.

Беларускае войска да снежня гэтага года атрымае айчынны мабільны камплект сувязі, які называюць аналагам Starlink. Пра гэта ў эфіры тэлеканала «Беларусь 1» паведаміў кіраўнік сувязі Узброеных сілаў краіны Вадзім Раманіў.

– Летась Лукашэнку быў прапанаваны наш мабільны камплект сувязі – так званы аналаг Starlink. Сёлета мы канчаткова дапрацавалі гэты камплект практычна да дасканаласці і палепшылі ягоную якасць і колькасць паслуг. І ўжо сёння мы дэманструем ягоныя магчымасці. І да пачатку новага навучальнага года ён будзе ў войсках, – сказаў Раманіў.

Кіраўнік сувязі запэўніў, што да пачатку новага навучальнага года, які ў войску пачынаецца ў снежні, «беларускі Starlink» будзе ў войсках.

Нагадаем, «аналаг Starlink» Лукашэнку паказалі 6 кастрычніка 2023 года. Вайскоўцы заявілі, што сістэма апроч сувязі дае дыстанцыйны доступ да інтэрнэту.

– Гэта значыць, ты тое, што Маск за мільярды даляраў рабіў, ты сам зрабіў бясплатна? – пацікавіўся Лукашэнка.

Беларускі вайсковы спецыяліст удакладніў:

– Ну, не бясплатна, але за вельмі маленькія грошы.

Беларусы ў каментарах тады высмеялі рэакцыю Лукашэнкі на «аналаг Starlink».