У Беларусі з'явіўся новы чыгуначны маршрут

• 4.11.2024, 18:12

Продаж білетаў ужо даступны.

Беларуская чыгунка запусціла новы маршрут Мазыр - Калінкавічы - Менск і назад. Як паведамілі ў прэс-службе БЧ, цяпер штодзень будуць курсаваць дзве пары электрацягнікоў рэгіянальнага бізнэс-класа пад нумарамі 874/873 і 876/875.

• З Мазыра цягнікі адпраўляюцца а 05:40 і 17:57, прыбываюць у Менск а 09:34 і 21:46.

• З Менска электрычкі сыходзяць а 13:45 і 19:38, вяртаючыся ў Мазыр а 17:36 і 23:50.

Электрычкі будуць рабіць прыпынкі ў такіх населеных пунктах, як Пухавічы, Асіповічы, Бабруйск, Жлобін, Светлагорск і Калінкавічы.

Запуск новых складаў стаў магчымы дзякуючы заканчэнню электрыфікацыі і мадэрнізацыі інфраструктуры на ўчастку Калінкавічы - Барбароў.

Білеты ўжо можна набыць, іх кошт вагаецца ад Br12 да амаль Br17 у залежнасці ад узроўню камфорту.