Апазіцыя ў Грузіі плануе штодзённыя пратэсты супраць фальсіфікацыі выбараў

• 4.11.2024, 20:29

Грузіны маюць намер сфармаваць «магутны пратэставы рух, які зрыне рэжым».

Акцыі грузінскай апазіцыі праз нязгоду з абвешчанымі вынікамі парламенцкіх выбараў 26 кастрычніка будуць мець штодзённы характар.

Пра гэта заявіў адзін з лідараў апазіцыйнай «Кааліцыі за перамены» Ніка Мелія на мітынгу ля будынка парламента Грузіі ў панядзелак, 4 лістапада, паведамляе «Рэха Каўказа».

Паводле словаў Меліі, апазіцыя мае намер сфармраваць «адзін магутны пратэставы рух, які зрыне рэжым», і ўжо анансавала наступную акцыю пратэсту на 5 лістапада ля тбіліскага Палаца спорту.

«Мы будзем на вуліцы кожны дзень. Нас павінна быць столькі, каб ніхто не мог увайсці сюды (у парламент. – Рэд.), але стаяць толькі на Руставелі недастаткова, мы павінны стаяць на ўсіх праспектах», – дадаў палітык.

Як мяркуецца, апазіцыя плануе блакаваць асноўныя транспартныя артэрыі горада, мяркуе «Рэха Каўказа».