ГУВ: Украінскія войскі атакавалі спецназ КНДР

• 5.11.2024, 15:14

Ваенная выведка Украіны раскрыла дэталі.

Першае баявое сутыкненне ўкраінскіх байцоў і паўночнакарэйскіх вайскоўцаў адбылося ў Курскай вобласці.

Як піша Financial Times, дэталі раскрыў высокапастаўлены прадстаўнік украінскай выведкі.

Паводле ягоных слоў, гэта адбылося ў Курскай вобласці, дзе Украіна кантралюе каля 600 кв. км тэрыторыі, ці крыху больш за палову таго, што яна раней утрымлівала пасля летняга ўварвання.

У Курскай вобласці Расеі адбыліся першыя баявыя сутыкненні паміж украінскімі і паўночнакарэйскімі вайскоўцамі.

У той жа час, паводле звестак суразмоўцы, пра буйныя сутыкненні «пакуль гаворка не ідзе».

Галоўная ўправа ваеннай выведкі Украіны заявіла на выходных, што Расея ўзброіла паўночнакарэйскія войскі ў Курску 60-мм мінамётамі, аўтаматамі, кулямётамі, снайперскімі вінтоўкамі, супрацьтанкавымі кіраванымі ракетамі і супрацьтанкавымі ракетнымі комплексамі з плечавым запускам.

Са звестак ГУВ, некаторыя з іх таксама былі забяспечаныя прыборамі начнога бачання і цеплавізарамі. Некалькі сотняў вайскоўцаў паўночнакарэйскага спецыяльнага прызначэння таксама былі разгорнутыя ў Курску.