ЕЗ адрэагаваў на смерць беларускага палітвязня

• 6.11.2024, 18:47

І заклікаў рэжым вызваліць вязняў сумлення.

Смерць чарговага палітвязня ў Беларусі дэманструе "бесчалавечную прыроду" рэжыму Аляксандра Лукашэнкі, заявіў у сацсетцы Х афіцыйны прадстаўнік Еўрапейскай службы замежных дзеянняў (ЕСЗД) Петэр Стана.

Выказаўшы шкадаванне ў сувязі са смерцю палітвязня Дзмітрыя Шлетгаўэра, Стана нагадаў, што ён стаў сёмым палітвязнем, які памёр у Беларусі.

Прадстаўнік ЕЗ адзначыў таксама, што вязні рэжыму застаюцца ў зняволенні ў жахлівых умовах.

"Яны павінны быць неадкладна вызваленыя", - падкрэсліў ён.

Зміцер Шлетгаўэр, які памёр у магілёўскай ПК-15, як мінімум дзявяты палітвязень, які памёр у беларускіх турмах.

21 траўня 2021 года ў Шклоўскай калоніі памёр палітвязень Вітольд Ашурак.

5 студзеня 2022 года ў Магілёве скончыў жыццё самагубствам палітвязень Зміцер Дудойць.

7 траўня 2023 года ў калоніі памёр палітвязень Мікалай Клімовіч.

5 ліпеня 2023 года ў Лідскім РАУС раптоўна памёр 37-гадовы мясцовы паэт, удзельнік фестываляў сучаснага мастацтва Дзмітрый Сарокін.

11 ліпеня 2023 года ў Гарадзенскай турме ад прабадной язвы памёр мастак Алесь Пушкін.

13 студзеня 2024 года ў віцебскай калоніі №3 ад пнеўманіі памёр 50-гадовы палітвязень Вадзім Храсько.

20 лютага 2024 года стала вядома пра смерць у турме актывіста апазіцыі Ігара Ледніка, які меў групу інваліднасці праз праблемы з сэрцам.

10 красавіка 2024 года ў берасцейскім СІЗА памёр абвінавачаны ў абразе Лукашэнкі падпалкоўнік ПДВ Аляксандр Кулініч.