У Гішпаніі знайшлі найбуйнейшую партыю какаіну ў бананах

• 6.11.2024, 19:37

13 т наркотыку было знойдзена ў кантэйнеры з Эквадора.

Паліцыя і мытня Гішпаніі канфіскавалі 13 т какаіну, знойдзенага ў кантэйнеры з бананамі з Эквадора ў порце горада Альхесіраса, піша El Mundo.

Гэта найбуйнейшая партыя наркотыку, знойдзеная ў Гішпаніі пасля таго, як у тым жа порце было перахоплена амаль 9,5 т летам 2023 года.

Груз прызначаўся кампаніі з правінцыі Алікантэ. Цягам многіх гадоў яна атрымлівала вялікую колькасць садавіны з краін Паўднёвай Амерыкі, але ў выніку была ліквідаваная. На гэты момант адзін падазраваны затрыманы ў Таледа.

El País у кастрычніку са спасылкай на крыніцы пісала аб выяўленні ў Альхесірасе 13 т какаіну, схаванага ў кантэйнеры з бананамі. Груз прыбыў з Эквадора, атрымальнікам была кампанія, якая базуецца ў муніцыпалітэце Кампелье правінцыі Алікантэ. Адзін чалавек быў арыштаваны, пад следствам знаходзяцца яшчэ некалькі, паведамляла газета.

Партыю наркотыку знайшлі ў сярэдзіне кастрычніка. Пазней у кампаніі ў Алікантэ прайшлі ператрусы.

У жніўні мінулага года ў Альхесірасе былі канфіскаваныя 9,5 т какаіну. Ён быў замаскаваны пад партыю бананаў і схаваны ў 1080 скрынях. Следчыя тады высачылі, прынамсі, 30 еўрапейскіх кампаній, звязаных з гэтым грузам.