Стаяногла прызнаў перамогу Санду на прэзідэнцкіх выбарах у Малдове

• 6.11.2024, 19:40

Прарасейскаму кандыдату спатрэбіліся для гэтага тры дні.

Кандыдат у прэзідэнты Малдовы Аляксандр Стаяногла прызнаў сваё паражэнне дзейнай прэзідэнтцы Маі Санду на выбарах. Ён зрабіў гэта праз тры дні пасля абвяшчэння Маі Санду пераможцай.

"Вынікі паказалі: мы саступілі, хаця тут, у Малдове, мы перамаглі", — гаворыцца ў яго звароце.

Ён дадаў, што "гэта не канчатковая параза, гэта толькі прайграная бітва".

На яго думку, выбары прэзідэнта Малдовы паказалі, "наколькі слабая і штучная перамога ўлады, якая не ўмее саступаць", таму яе паражэнне "толькі пытанне часу".

Нагадаем, на прэзідэнцкіх выбарах, якія прайшлі ў Малдове, перамогу атрымала дзейная лідарка Мая Санду. У другім туры яна набрала 54,35 адсотка галасоў. Яе апанента - вылучэнца прарасейскай Партыі сацыялістаў Аляксандра Стаяногла - падтрымалі 44,65%. Пры гэтым Санду перамагла за кошт малдаўскай дыяспары за мяжой: на замежных участках за яе прагаласавалі 82,67 адсотка выбарцаў. Унутры краіны перамог Стаяногла з вынікам 51,19%.