Мэтавік не прыехаў працаваць паводле размеркавання, але пазбавіўся большай часткі завінавачанасці за вучобу

• 7.11.2024, 12:46

Як гэта ў яго атрымалася?

Суд Фрунзенскага раёна Менска разгледзеў справу аб спагнанні грошай з выпускніка, які вучыўся паводле мэтавага накіравання. Пасля каледжа малады чалавек мусіў працаваць у сельскай гаспадарцы, але не з'явіўся на месца размеркавання. На ім павіс вялізная завінавачанасць за вучобу, аднак хлопец патрапіў у войска - і гэта часткова развязала ягоную праблему. Аб выпадку стала вядома з банка судовых пастаноў, піша «Зеркало».

Юнак паступіў у каледж паводле мэтавага накіравання ад управы сельскай гаспадаркі Асіповіцкага райвыканкама. Амаль чатыры гады ён вучыўся на тэхніка-механіка за кошт абласнога бюджэту і паводле дамовы павінен быў потым адпрацаваць тры гады ў сельгасарганізацыі свайго раёна.

У ліпені 2021 года хлопец атрымаў дыплом і накіраванне на працу. Першага жніўня ён павінен быў пачаць абавязкі, але на прадпрыемства так і не з'явіўся. Праз паўтара месяца арганізацыя паведаміла ў каледж аб нез’яўленні маладога спецыяліста.

Тады навучальная ўстанова накіравала выпускніку прапанову добраахвотна кампенсаваць выдаткаваныя на яго навучанне грошы - 19 640 рублёў. Але тут высветлілася, што ў кастрычніку 2021 года хлопец патрапіў на тэрміновую службу ў войска. Невядома, ці планаваў ён такі паварот, але ў нейкай ступені гэта яму дапамагло.

Маладзён дэмабілізаваўся ў ліпені 2023 года (чамусьці служба зацягнулася на 20 месяцаў замест 18 - магчыма, хлопец пасядзеў на гаўптвахце, што не ўлічваецца ў тэрмін службы). Пасля гэтага ён сутыкнуўся з судовым пазовам ад каледжа.

Аднак паводле беларускага заканадаўства тэрміновая служба залічваецца ў тэрмін абавязковай адпрацоўкі ў размеркаванні. Калі б выпускнік-мэтавік, які не з'явіўся па размеркаванні, праслужыў у войску ўвесь тэрмін адпрацоўкі, то пазыку за вучобу з яго ўвогуле б не спаганялі. Але ў гэтым выпадку хлопец адслужыў блізу 20 месяцаў, і гэты перыяд быў залічаны ў тэрмін абавязковай працы.

У выніку сума пазыкі была прапарцыйна зменшаная. І за неадпрацаваныя 16 месяцаў (замест 36) юнаку давялося заплаціць 8 728 рублёў. Выпускніка абавязалі вярнуць гэтыя грошы ў абласны бюджэт, які плаціў за ягонае навучанне. Таксама з яго спагналі дзяржаўную мыту - 436,4 рубля.