Блізу 40 малпаў уцяклі з даследчага цэнтра ў ЗША

• 7.11.2024, 16:03

Па горадзе расставілі пасткі.

Паліцыя штата Паўднёвая Караліна ў ЗША шукае амаль 40 паддоследных малпаў, якія ўцяклі з даследчага цэнтра ў горадзе Емасі. Пра гэта паведаміў тэлеканал NBC News.

«Жыхарам настойліва рэкамендуецца трымаць дзверы і вокны зачыненымі, каб прадухіліць пранікненне гэтых жывёлін у дамы», – гаворыцца ў заяве дэпартамента шэрыфа Емасі.

Жыхароў перасцераглі ад кантактаў з гэтымі жывёламі, паліцыя рэкамендавала тым, хто заўважыць малпаў, адразу тэлефанаваць на 911. Па горадзе расставілі пасткі, паліцыянты спрабуюць адсачыць жывёл па камерах відэаназірання.

У паліцыі ўдакладнілі, што малпы ўцяклі з цэнтра Alpha Genesis. Кампанія пастаўляе прадукты і паслугі ў галіне біялагічных даследаванняў, звязаныя з прыматамі, вынікае з апісання яе сайта. У асноўным, кампанія працуе з макакамі і капуцынамі.