ЗША вылучылі Украіне $ 1,3 млрд

• 8.11.2024, 20:08

На кампенсацыю выдаткаў дзяржбюджэту.

Украіна ў найбліжэйшыя дні атрымае грант ад ЗША памерам $1,35 млрд на кампенсацыю выдаткаў дзяржбюджэту, не звязаных са сферай бяспекі і абароны. Пра гэта паведаміла прэс-служба Міністэрства фінансаў пасля падпісання грантавага пагаднення з Сусветным банкам у рамках праекту «Падтрымка дзяржаўных выдаткаў у забеспячэнні ўстойлівага дзяржаўнага кіравання ва Украіне» (PEACE in Ukraine).

Таксама пакет падтрымкі ўключае 10,8 млн еўраў сродкаў з Мэтавага фонду многіх донараў у суфінансаванні Праграмы Другой пазыкі на палітыку развіцця ў сферы эканамічнага аднаўлення для Украіны.

«Задзейнічаныя сродкі стануць важкім унёскам у забеспячэнне першачарговых сацыяльных выдаткаў дзяржбюджэту Украіны», – пракаментаваў міністр фінансаў Сяргей Марчанка.

З пачатку поўнамаштабнага ўварвання дзякуючы праекту PEACE in Ukraine Мінфін задзейнічаў ужо амаль $28 млрд і больш за 1,4 млрд еўраў бюджэтнай падтрымкі.

У рамках супрацоўніцтва з Сусветным банкам усе выплаты робяцца на падставе штомесячных справаздачаў, асобна ў кожнай катэгорыі супрацоўнікаў і атрымальнікаў сацыяльнай дзяржаўнай дапамогі.