Дрэнны сігнал для Пуціна

• 9.11.2024, 15:43

Трамп атрымаў ад Еўропы цікавую прапанову.

Прэзідэнтка Еўрапейскай камісіі Уршуля фон дэр Ляен падчас тэлефоннай размовы з новаабраным прэзідэнтам ЗША Дональдам Трампам прапанавала яму ідэю павелічэння імпарту амерыканскага ЗПГ, каб замяніць ім расейскі.

«Мы ўсё яшчэ атрымліваем шмат ЗПГ праз Расею, з Расеі. І чаму б не замяніць яго амерыканскім ЗПГ, які таннейшы і зніжае нашыя кошты энерганосьбітаў», — сказала яна, перадае Bloomberg.

Фон дэр Ляен павіншавала Трампа з перамогай на выбарах і абмеркавала падтрымку Украіны

Са слоў фон дэр Ляен, ЗПГ быў «адной з тэм, якія мы закранулі».

У той жа час прэзідэнтка Еўракамісіі адзначыла, што размова з Трампам не паглыблялася ў дэталі аб ЗПГ, і "гэта тое, што мы можам абмеркаваць", — сказала яна.

ЗША ўжо з'яўляюцца найбуйным еўрапейскім пастаўшчыком ЗПГ, але імпарт з Расеі застаецца на другім месцы. У 2024 годзе Заходняя Еўропа ўжо купіла больш ЗПГ з Расеі, чым за ўвесь 2023, паводле звестак Bloomberg.