У футбольным сімулятары ад Раналду ёсць беларуская мова

• 13.12.2024, 16:50

Легендарны партугальскі гулец інвеставаў у гульню блізу 40 мільёнаў даляраў.

Кіпрская кампанія Strikerz Inc. прапанавала доўгачаканую навінку – футбольны сімулятар UFL. Высветлілася, што ягоныя стваральнікі падумалі і пра беларусаў, піша «Наша Ніва».

UFL называюць гульнёй Крыштыяну Раналду, бо легендарны партугальскі гулец інвеставаў у яе блізу 40 мільёнаў даляраў. Гэта футбольная ліга, у якой можна будзе ствараць свае клубы і выбіраць для іх гульцоў з тысячаў футбалістаў. Праект даступны на гульнявых прыстаўках PS5 і Xbox Series, у 2025-м выпусцяць ягоную версію для кампутараў.

У сімулятары можна выбраць для гульні адну з дзесяці моваў, у тым ліку беларускую (для інтэрфэйсу і каментатараў). Акрамя яго, UFL працуе на расейскай і ўкраінскай мовах, і, вядома, на заходнееўрапейскіх мовах: напрыклад, даступныя ангельская, французская і гішпанская мовы.