Рыбак злавіў вялізнага судака на Прыпяці

• 14.12.2024, 14:38

Улоў стаў рэкордам гэтай рыбы ў Беларусі.

З выдатным уловам з рыбалкі на Прыпяці пад Жыткавічамі вярнуўся дадому жыхар Бабруйска. Трафеем стаў вялізны судак, вага якога склала 7,7 кілаграма, паведамляе Onlíner.

– Першапачаткова мы збіраліся з напарнікам паехаць на Светлагорскае вадасховішча, але ён прыхварэў. І я надумаў з'ездзіць на Прыпяць, дзе ўжо неаднаразова рыбачыў. Ды і рыбацкае чуццё падказвала: гэта мой шанец [на трафей], – кажа Андрэй Шэўчык. – Спачатку адкатаўся на лодцы тры гадзіны, але безвынікова, нічога не клявала. Праехаўшы 200 км на рыбалку, было крыўдна вяртацца ні з чым, і я надумаў выйсці на бераг, упарадкаваць свае думкі, пад’есці і падумаць, як лавіць далей.

Неўзабаве Андрэй прадоўжыў рыбалку і на глыбіні 2,7 метра, паказанай рэхалотам, адчуў клёў.

– Было адчуванне, што ў мяне на кручку мяшок з бульбай павіс. А я яшчэ пры гэтым крыху газануў, лодка паскорылася, і рыбу, як корак з бутэлькі з шампанскім, выдрала на паверхню. Я выключыў перадачу і пачаў выкачваць рыбу. У прынцыпе, вялікага супраціву судак не чыніў. Злавіў яго на спінінг, прынада – воблер, – успамінае ў гутарцы з Onlíner рыбак.

Андрэй расказвае, што гэта самы буйны судак, якога ён калі-небудзь лавіў: даўжыня рыбіны склала 85 см, вага – 7,7 кг.

Інтэрнэт-выданне fishingby.com сцвярджае, што ўлоў Андрэя – рэкорд судака ў Беларусі. Папярэдні нібыта належаў гамяльчаніну Яўгену Буцькаўцу. Улетку ён злавіў судака на 7,1 кг. Але ёсць звесткі ад саміх рыбаловаў, паводле якіх самыя буйныя экзэмпляры судакоў у Беларусі складалі 13–14 кг. Такіх лавілі на Лукомскім возеры. Адзін з рыбакоў – чытач Onlíner – расказаў нам, што 2 гады таму на гэтым вадаёме злавіў такую рыбіну на 8,2 кг.