У турме Асада знайшлі загадкава зніклага амерыканца

• 14.12.2024, 17:13

Гісторыя яго знікнення ахутаная таямніцамі.

З сірыйскай турмы вызвалілі амерыканскага паломніка Трэвіса Цімермана. Гісторыя яго знікнення ахутаная таямніцамі, піша BILD.

29-гадовы Цімерман быў вызвалены з турмы і вылецеў з краіны дзякуючы ўмяшанню амерыканскіх вайскоўцаў. Аперацыя эвакуацыі прайшла паспяхова - і Цімерман зараз знаходзіцца ў бяспецы.

Як вядома, Цімерман адправіўся ў Сірыю сем месяцаў таму, здзяйсняючы паломніцтва "з духоўных прычын". Пазней яго арыштавалі.

«Знікненне Цімермана стала загадкай: апошні раз яго бачылі ў жніўні ў Будапешце, пасля чаго яго пошукі пачалі і вугорская паліцыя, і ўлады штата Місуры. Пасля зрынання рэжыму Башара Асада Цімермана знайшлі ў турме ў Дамаску», - піша выданне.

Амерыканец заявіў, што да яго ставіліся нармальна, пазбягаючы гвалту, хаця чуў крыкі іншых зняволеных. Спачатку ён адмаўляўся ад кантакту з уладамі ЗША, але пасля пагадзіўся на эвакуацыю.

Некаторыя мясцовыя журналісты прынялі Цімермана за амерыканскага рэпарцёра Осціна Тайса, які знік у Сірыі больш за дзесяць гадоў таму. Аднак гэтая здагадка была памылковай - лёс Тайса застаецца невядомым.