Reuters: Расея выводзіць войскі з Сірыі, але ёсць нюанс

• 15.12.2024, 10:09

Крэмль хоча захаваць кантроль.

Расея адводзіць свае войскі з лініі фронту на поўначы Сірыі і з пастоў у Алавіцкіх гарах. У той жа час Крэмль захоўвае кантроль над дзвюма ключавымі базамі - авіябазай Хмеймім у Латакіі і вайскова-марскім аб'ектам у Тартусе.

Аб гэтым піша агенцтва Reuters.

Спадарожнікавыя здымкі, зробленыя ў пятніцу, 13 снежня, сведчаць, што, прынамсі, два Ан-124, адны з найбуйнейшых у свеце грузавых самалётаў, рыхтаваліся да загрузкі на базе Хмеймім. Як мінімум адзін транспартнік вылецеў у суботу ў Лібію, гаворыць сірыйскі супрацоўнік службы бяспекі.

Сірыйскія вайскоўцы і крыніцы бяспекі, якія кантактавалі з расейцамі, паведамілі Reuters, што Расея адводзіць свае сілы ад лініі фронту і адводзіць частку цяжкай тэхнікі і старэйшых сірыйскіх афіцэраў.

У той жа час, паводле звестак крыніц, Расея не выводзіць свае дзве асноўныя базы і пакуль не мае намеру гэтага рабіць.

Сірыйскія вайскоўцы, якія супрацоўнічаюць з расейцамі, адзначаюць, што частка цяжкай тэхнікі і высокапастаўленыя афіцэры войска Асада ўжо адправіліся ў Маскву.

Старэйшы афіцэр сірыйскага войска, які падтрымлівае сувязь з расейскімі вайскоўцамі, сказаў Reuters, што на цяперашнім этапе мэта палягае ў тым, каб перагрупавацца і перадыслакавацца ў адпаведнасці з падзеямі на месцы.

Чыноўнік, блізкі да новай часовай адміністрацыі, сказаў Reuters, што пытанне расейскай вайсковай прысутнасці ў Сірыі і мінулыя пагадненні паміж урадам дыктатара Асада і Масквой не абмяркоўваюцца.

«Гэта пытанне для будучых перамоваў, і апошняе слова будзе за сірыйскім народам», - сказаў ён, дадаўшы, што Масква наладзіла каналы сувязі.

Ён дадаў, што сілы паўстанцаў знаходзяцца ў непасрэднай блізкасці ад расейскіх баз у Латакіі.

Расейская крыніца на ўмовах ананімнасці паведаміла, што перамовы з новымі ўладамі Сірыі прадаўжаюцца і Расея не выходзіць са сваіх баз.