Стала вядома, чаму банкі масава ўводзяць абмежаванні для замежных картак

• 16.12.2024, 18:17

Абмежаванне будзе дзейнічаць да 1 лютага.

Нацбанк запатрабаваў, каб камерцыйныя банкі ўвялі абмежаванні па зняцці гатоўкі з замежных картак, паведамляе прэс-служба рэгулятара.

Абмежаванне для зняцця гатоўкі і ўнясення грошай праз банкі па замежных картках будзе дзейнічаць з 20 снежня 2024 года да 1 лютага 2025-га.

У банкаматах будзе абмежаваная сума зняцця гатоўкі з картак замежных банкаў - не больш за 25 базавых адзінак на месяц для адной карткі (цяпер гэта 1000 рублёў).

Калі спатрэбіцца зняць большую суму, гэта можна будзе зрабіць толькі праз касу банка, паказаўшы пашпарт. Для папаўнення рахунку гатоўкай праз касу таксама спатрэбіцца картка, іншы аплатны інструмент або пашпарт.

Папаўненне рахункаў праз банкаматы, тэрміналы і іншыя прылады самаабслугоўвання стане магчымым толькі з выкарыстаннем карткі ці аплатнай прылады, якая дазваляе ідэнтыфікаваць уладальніка.

Гэтыя захады рэгулятар увёў для зніжэння рызыкі махлярства і абароны грамадзян, паведамляецца на сайце Нацбанка.