Беларуска назло мужу прадала дарагі пазадарожнік у 120 разоў танней

• 17.12.2024, 18:42

Аўтамабіль пайшоў за 600 рублёў.

Беларуска на злосць мужу прадала дарагі пазадарожнік у 120 разоў танней за яго кошт. Падрабязнасці агучылі ў прэс-службе Дзяржаўнага камітэта судовых экспертыз.

У паведамленні сказана, што ў суд Пінскага раёна і горада Пінска звярнуўся мужчына. Падчас судовага пасяджэння быў разгледжаны пазоў да былой жонкі аб падзеле супольна нажытай маёмасці.

Высветлілася, што бакі не могуць прыйсці да пагаднення аб кошце спрэчнага аўтамабіля Mitsubishi 2018 года выпуску, які быў набыты ў шлюбе. Жанчына патлумачыла, што прадала аўтамабіль два гады таму за 600 рублёў. Аднак з такім крокам былой жонкі мужчына не пагадзіўся з прычыны таго, што яму вядома, што кошт сямейнага аўто ў разы даражэйшы.

У прэс-службе адзначылі, што для ўстанаўлення кошту аўтамабіля пры ўліку адсотка зносу праводзілася аўтатаваразнаўчая экспертыза. З высноў эксперта вынікае, што кошт Mitsubishi без уліку яго фактычнага стану складае больш за 72 тысячы рублёў.