На польска-беларускай мяжы вецер паваліў дрэва проста на аўтамабіль памежнікаў

• 18.12.2024, 8:59

Відэафакт.

На польскім баку Белавежскай пушчы, ля мяжы з Беларуссю, моцны вецер паваліў дрэвы. Адно з іх упала проста на памежны паркан і аўтамабіль польскай памежнай службы, піша MOST.

Як паведамілі ў польскім памежным ведамстве, адно з паваленых дрэў «пашкодзіла сродкі тэхнічнага забеспячэння мяжы» і службовы аўтамабіль памежнікаў. У транспартным сродку пакамечаны дах, пабітае шкло. Супрацоўнікі ведамства, якія знаходзіліся ўнутры, не пацярпелі.

Наступствы разгулу стыхіі на польскім баку мяжы хутка ліквідавалі, зрабілі справаздачу ў памежнай службе Польшчы.