Зяленскі: Украіна працуе над зменай погляду Шольца на пастаўкі Taurus

• 2.12.2024, 19:47

Канцлер ФРГ прыбыў у Кіеў з неабвешчаным візітам.

Украіна працуе над тым, каб змяніць меркаванне канцлера Нямеччыны Олафа Шольца ў пытанні перадачы дальнабойных ракет Taurus. Аб гэтым заявіў прэзідэнт Украіны Уладзімір Зяленскі падчас супольнай прэс-канферэнцыі ў панядзелак, 2 снежня.

«У нас з Олафам ёсць розныя погляды на некаторыя пытанні. Мы працуем увесь час над тым, каб у пытанні Taurus у нас было больш агульнага», – сказаў Зяленскі.

Ён адзначыў, што Украіна працавала над пазіцыяй Нямеччыны, ЗША, Францыі і Вялікай Брытаніі па пастаўках дальнабойнай зброі.

Прэзідэнт Украіны таксама адзначыў, што абмеркаваў з канцлерам узмацненне ўкраінскай супрацьпаветранай абароны.

У той жа час Шольц паведаміў, што ў снежні Украіна атрымае ад Нямеччыны шостую сістэму супрацьпаветранай абароны IRIS-T, пускавыя ўстаноўкі для Patriot і САУ Gepard.

2 снежня Олаф Шольц прыбыў у Кіеў з неабвешчаным візітам. Ён абвясціў аб падрыхтоўцы Берлінам для Кіева яшчэ аднаго пакета ваеннай дапамогі - на суму 650 млн еўра.

Прадстаўнік мінабароны ФРГ зазначыў, што Германія перадасць Украіне новы пакет ваеннай дапамогі да канца 2024 года, у які ў прыватнасці будзе ўключана сістэма супрацьпаветранай абароны IRIS-T.