Эшалон гаўбіц КНДР прыбыў у РФ

• 20.12.2024, 9:53

Што гэта значыць і як паўплывае на фронт?

Расейская прамысловасць не здольная цалкам выконваць запатрабаванні УС РФ у прыладах, рулях і набоях патрэбнага калібру 170 мм. У сувязі з гэтымі праблемамі Крэмль звярнуўся па дапамогу да КНДР і атрымаў неабходную артылерыю для працягу расейска-ўкраінскай вайны. Аб тым, якія новыя праблемы з'явіліся ў расейцаў праз супрацоўніцтва з Паўночнай Карэяй, распавяло выданне Forbes.

Выданне звярнула ўвагу на прыбыццё эшалона, загружанага гаўбіцамі "Коксан" M-1989 Паўночнай Карэі. Гэта ўжо другі эшалон, які прыбыў у РФ цягам апошніх двух месяцаў. Тым часам РФ уваходзіла ў расейска-ўкраінскую вайну, маючы 2 тысячы гусенічных гаўбіц, але на трэці год баёў 800 з іх знішчаны. Акрамя таго, ёсць нястача новых руляў, таму яшчэ 100 гармат не працуе, хоць і ацалелі. З іншага боку, ваенна-прамысловы комплекс расейцаў не можа справіцца з выпускам новых гармат, пры гэтым на складах часоў СССР вышукваюць іржавыя ўстаноўкі і спрабуюць іх аднавіць, растлумачылі ў артыкуле. Такім чынам, КНДР развязвае праблемы расейцаў у артылерыі, рэзюмаваў аўтар Forbes, але і з гэтым не ўсё ў парадку - з'явіліся новыя праблемы.

Пра што гаворыць пастаўка гаўбіц КНДР у РФ і якія наступствы гэтага працэсу:

гаўбіцы M-1989 страляюць набоямі калібру 170 мм, а гэта «нязвыклы калібр для расейцаў»;

крыніцай набояў 170 мм для расейскага войска стане КНДР - толькі ў гэтай краіне ёсць адпаведныя заводы;

Паўночная Карэя таксама перадала РФ набоі звыклых для расейцаў калібраў (122 і 152 мм), а супрацоўніцтва ў гэтым кірунку сведчыць аб тым, што расейскі ВПК не здольны вырабіць патрэбную колькасць сродкаў паразы;

КНДР у абмен на гарматы Чучхе атрымлівае тэхналогіі вырабу ракет і падводных лодак, носьбітаў ядзернай зброі.

«Калі казаць асцярожна, то расейскія сілы становяцца залежнымі ад паўночнакарэйскай зброі. Кожная M1989, якая становіцца расейскай, верагодна, паглыбляе залежнасць Расеі ад Паўночнай Карэі», – рэзюмаваў аўтар Forbes.

У той жа час выданне вылучыла несувымернасць тэхналогій, якімі абменьваюцца паўночнакарэйцы і расейцы. Калі КНДР атрымлівае ядзерныя тэхналогіі, то РФ - старыя гарматы.

«Але які выбар у Расеі, паколькі яе знясілены артылерыйскі корпус паступова становіцца больш паўночнакарэйскім?» - рытарычна спытала выданне.