Беларусы расказалі, які падарунак ад работадаўцаў хочуць атрымаць

• 21.12.2024, 19:38

Самыя непапулярныя варыянты - брэндаваныя сувеніры.

Напярэдадні навагодніх свят сайт rabota.by правёў апытанне супрацоўнікаў беларускіх кампаній, каб высветліць, якія падарункі яны чакаюць ад працадаўцаў і ці хочуць адзначаць Новы год з калегамі, піша office life .

Як выявілася, большасць апытаных (82,9%) хацелі б атрымаць ад наймальніка грашовую прэмію да Новага года.

Прыкладна чвэрць разлічвае на нейкія дыхтоўныя і карысныя падарункі, а кожны пяты - на сертыфікаты ў спа, фітнэс, забаўкі.

Менш за 15% хацелі б атрымаць салодкія падарункі для сваіх дзяцей.

Самыя непапулярныя варыянты - брэндаваныя сувеніры ад кампаніі (менш за 10%) і цукеркі, садавіна, шампанскае (усяго толькі 5,9%).

Цікава, што больш за траціну апытаных не пойдуць на навагодні карпаратыў. Самым папулярным тлумачэннем гэтага стала жаданне правесці час з сям'ёй (42% апытаных) і нежаданне марнаваць грошы на карпаратыў (35,9%).

На думку ўдзельнікаў апытання, самае важнае на карпаратыве - гэта магчымасць пагутарыць з калегамі ў непрацоўнай атмасферы, смачная ежа і напоі, а таксама цікавая праграма.

У апытанні ўзялі ўдзел 1692 супрацоўнікі розных кампаній.