У Менску з'явілася ялінка з вельмі дзіўнымі ўпрыгажэннямі

• 22.12.2024, 18:38

Відэа.

У Менску ў Ракаўскім прадмесці паставілі калядную ялінку. З ідэі яна павінна была звыкла адсылаць да настальгіі па часах БССР, але атрымаўся нейкі вельмі дзіўны рэверанс у бок Савецкай Расеі, адзначае выданне Citydog.

На ялінку звярнулі ўвагу аўтары інстаграм-канала Malina_blr: «Вельмі мілая ялінка, якая занурае вас у дзяцінства».

На першы погляд, ялінка і сапраўды можа занупрыць у дзяцінства - прынамсі, у дзіцяча-юнацкія гады тых, каму цяпер за 40. Як у старыя часы, сапраўдная (а не штучная) ялінка ўпрыгожаная сцяжкамі, агеньчыкамі і нават бутафорскай хлапушкай - і на гэтым, мяркуючы з усяго, аналогіі з дзяцінствам савецкага менчука заканчваюцца.

Акрамя ўсяго, на ялінцы вісяць бутафорскія ўпакоўкі цукерак «Кара-Кум», «Алімпійскі мішка», «Алёнка» - але праблема ў тым, што прысмакі гэтыя выраблялі ў Маскве, і, калі хтосьці памятае дзяцінства ў БССР, у Менск яны практычна не траплялі (балазе заўсёды былі цукеркі «Камунаркі»). То бок, калі гэта і адсылае да дзяцінства, то не менчукоў, а масквічоў, напрыклад.

У дадатак унізе ялінка ўпрыгожаная паштоўкамі з РСФСР (якія ў Менску таксама з'яўляліся рэдка) і кружэлкамі ўсесаюзнай фірмы «Мелодыя» (а вось гэтае дабро можна было купіць у краме на Валадарскага).

Акрамя некалькіх добразычлівых каментароў пад допісам, ёсць і досыць непахвальныя, але на тэму:

«Каб на іх … Хто ведаў гэта, той дакладна не забудзе. А маладым людзям гэта ні пра што не гаворыць. Прыдумайце ўжо нешта новае, свяжэйшае, чым гэты блышыны рынак».

Тым больш, калі гэта рэчы не з роднага блышынага рынку…