Украінскія партызаны падарвалі аўтамабіль кіраўніка акупацыйнай рады Бярдзянска

• 24.12.2024, 12:58

Аўтамабіль поўнасцю згарэў.

Уночы 24 снежня ў акупаваным Расеяй горадзе Бярдзянску Запарожскай вобласці Украіны падарвалі аўтамабіль.

Як паведамляе выданне «Бердянск Сегодня», інцыдэнт здарыўся а 7 гадзіне раніцы паводле менскага часу ў двары дома на вуліцы Еўрапейскай, 56.

Паводле папярэдніх звестак, узарваны аўтамабіль мог належаць старшыні акупацыйнай рады горада Васілю Нячоту. Вядома, што транспартны сродак згарэў у выніку выбуху.