У Беларусі ўводзяць змены для ўладальнікаў аграсядзібаў і рамеснікаў

• 24.12.2024, 18:23

Паднялі падаткі і не толькі.

У 2025 годзе ў Беларусі павысяць падаткі для ўладальнікаў аграсядзібаў і рамеснікаў. Гэта прадугледжана праўкамі ў Падатковы кодэкс, піша «Люстэрка».

Уладальнікі аграсядзібаў цяпер плацяць падатак 40 рублёў на месяц, а рамеснікі – 6,5 рубля. У 2025 годзе гэтыя зборы паднімуць да 42 і 7 рублёў на месяц адпаведна.

Нагадаем, у пачатку верасня гэтага года «ўрад» зацвердзіў спіс відаў дзейнасці для рамеснікаў. У яго ўключылі выраб нацыянальных музычных інструментаў, вырабаў ручнога ткацтва, пражы, кавальскую і гарбарную справу. У спісе таксама выраб бочак (бондарства), мастацкая апрацоўка і роспіс вырабаў з розных матэрыялаў. Акрамя таго, дазволеныя для рамеснікаў выраб і рамонт пячных кафляў, дэкаратыўнай кафлі і пано-ўставак, кафляных карнізаў з прыроднай гліны, а таксама вазоў, саней і дзіцячых санак, вырабаў, выкананых у лапікавай тэхніцы. Сярод дазволеных ёсць выраб і рамонт кухоннага інвентару, цацак, інтэр'ерных лялек, дэкаратыўных пано, скарбонак, партсігараў, табакерак, попельніц, скарбонак, падсвечнікаў і іншай прадукцыі.

Таксама з 1 кастрычніка ў Беларусі пачала працаваць змена ў пенсійных унёсках у Фонд сацабароны насельніцтва (ФСАН). З гэтай даты іх павінны выплачваць рамеснікі, уладальнікі аграсядзібаў, а таксама самазанятыя на адзіным падатку. Пазней урад увёў яшчэ адну навіну для гэтых катэгорый насельніцтва – прапісалі, як яны павінны станавіцца на ўлік у фонд і здымацца з яго.