Італія павялічыла выдачу віз беларусам

• 25.12.2024, 18:06

Сёлета гэтае італьянскае пасольства выдала беларусам блізу 50 тысяч віз.

У 2024 годзе Італія на чвэрць павялічыла колькасць віз, выдадзеных беларусам.

Паводле інфармацыі італьянскага пасольства, сёлета было выдадзена амаль 50 тысяч уязных віз для грамадзян Беларусі, што на 10 тысяч больш чым летась.

У амбасадзе адзначылі, што "гэта выдатны паказчык, які быў дасягнуты дзякуючы бесперапыннай працы візавага аддзела, а таксама каштоўнаму ўзаемадзеянню са знешнім пастаўшчыком паслуг TLScontact".

У 2023 годзе італьянскае пасольства выдала беларусам звыш 40 тысяч віз, што стала рэкордным паказчыкам на той момант. Аднак кіраўнік італьянскай місіі ў Беларусі Тамаза П'етра Маркеджані ў пачатку года заяўляў, што ў 2024 годзе яны маюць намер устанавіць новы рэкорд.