Названая зброя, з якой расейцы маглі збіць пасажырскі самалёт Азербайджанскіх авіяліній

• 26.12.2024, 8:08

Некаторыя пашкоджанні корпуса маюць цыліндрычную форму.

Усё больш звестак паказвае на тое, што самалёт Embraer 190, які выконваў рэйс з Баку ў Грозны і пацярпеў катастрофу на тэрыторыі Казахстана, быў збіты расейскай СПА.

Вайсковы эксперт Ян Мацвееў выключыў магчымасць выбуху балона на борце самалёта, аб чым заяўляюць у Міністэрстве аховы здароўя Казахстана і што спрабуюць падхапіць расейскія прапагандысты.

Са слоў аналітыка, пры такім выбуху наўрад былі б хаатычныя пашкоджанні на корпусе самалёта – ад хваставой часткі да абцякальніка завесы закрылка.

А вось траплянне ў самалёт ракеты ЗРПК "Панцыр-С1" здольнае прывесці да такога роскіду.

Аналітык звярнуў увагу: некаторыя пашкоджанні корпуса маюць цыліндрычную форму, што адпавядае форме знішчальных элементаў ракеты згаданай сістэмы СПА.

Заснавальнік аналітычнай групы CIT Руслан Левіеў таксама мяркуе, што адтуліны на корпусе лайнера, які разбіўся, падобныя да «дзірак ад СПА».

Вонкавае ўздзеянне адзначае і нямецкі вайсковы аглядальнік Юліян Ропке, які пагаварыў з неназваным авіяэкспертам.

«Эксперт авіяцыі кажа мне: «Гэта не падобнае да пашкоджання пры катастрофе. Гэта сапраўды падобна да ўплыву звонку», – напісаў ён.

OSINT-аналітык Олівер Аляксандэр дадае, што наяўныя ўваходныя і выходныя адтуліны на абломках самалёта нельга было б атрымаць пры сутыкненні лайнера з птушкамі або пры катастрофе.

"Падобна да таго, што кожны асобны аскепак, які трапіў у самалёт, меў дастаткова кінетычнай энэргіі, каб прабіць ашалёўку, а не проста пакінуць увагнутасць", – падкрэсліў эксперт.