Аэрапорты Масквы закрылі праз атаку беспілотнікаў

• 26.12.2024, 17:01

Абвешчаны план “Дыван”.

У Маскве ўвялі часовыя абмежаванні на працу аэрапортаў “для гарантавання бяспекі палётаў”. Прычына - пагроза атакі беспілотнікаў. Таксама палёты абмежавалі ў Калузе, піша Baza.

Аэрапорты "Шарамеццева", "Дамадзедава", "Унукава", "Жукоўскі" і "Калуга" не прымаюць і не адпраўляюць авіярэйсы, інфармуе Расавіяцыя.

Улады ўвялі ў маскоўскіх аэрапортах, а таксама ў аэрадроме Калугі план "Дыван". “Папярэдне, праз чарговую пагрозы нападу беспілотнікаў. Затрыманы рэйсы на вылет і на прылёт. Прыём самалётаў спынілі з 15:45”, - паведамляе Mash. Паводле звестак канала, у аэрапортах Дамадзедава, Шарамеццева і Унукава затрыманы як мінімум 27 рэйсаў.

План “Дыван” - гэта рэжым закрытага неба ў авіяцыі. Ён прадугледжвае неадкладную пасадку або сыход з зоны дзеяння такога рэжыму ўсіх лятальных апаратаў, якія знаходзяцца ў паветры. “Дыван” можа абвяшчацца з розных прычын, у тым ліку дрэнныя ўмовы надвор'я, якія нясуць пагрозу бяспецы, або парушэнне паветранай прасторы замежным аб'ектам.