«Шанцы ў Лукашэнкі нулявыя»

• 27.12.2024, 11:00

Дыктатар здольны толькі на мядзведжую паслугу.

Лукашэнка ўпэўнены, што ведае імя будучага канцлера ФРГ, піша гісторык і палітычны аглядальнік Аляксандр Фрыдман:

- Імя названае не было, але гаворка ідзе, відавочна, пра Аліс Вайдэль з «Альтэрнатывы для Нямеччыны», якая выступае за шчыльнае супрацоўніцтва з Расеяй і была прыпісаная фраза «Мы не дзеці. Мы ведаем, што значыць танны газ».

Падобныя заявы ад Лукашэнкі - мядзведжая паслуга для «АдН», якая змагаецца з іміджам партыі «расейскіх марыянетак» і «сяброў Пуціна». Думаецца, што ў «АдН» уздыхнулі з палёгкай, даведаўшыся, што імя Аліс Вайдэль з вуснаў Лукашэнкі ўсё ж не прагучала, а значыць у прэсе не з'явяцца загалоўкі кшталту «Найбліжэйшы хаўруснік Пуціна бачыць Вайдэль на чале ўрада ФРГ».

Варта адзначыць, што ўзровень нямецкай экспэртызы Аляксандра Лукашэнкі вымушае жадаць лепшага. Якія яго шанцы ўбачыць Вайдэль на пасадзе канцлера ФРГ? Прыкладна такія ж, як убачыць Нікола Пашыняна жыўцом на саміце ЕўрАзЭС у Менску - нулявыя.