Кірбі: Салдаты КНДР нясуць масавыя страты на фронце

• 27.12.2024, 21:03

Да паўночнакарэйскіх салдатаў РФ ставіцца як да аднаразовага матэрыялу.

Паўночнакарэйскія войскі нясуць масавыя страты на вайне Расеі супраць Украіны. Толькі за апошні тыдзень у Курскай вобласці Расеі загінулі або атрымалі раненні тысячы салдатаў КНДР.

Пра гэта заявіў прадстаўнік Белага дому Джон Кірбі падчас брыфінгу ў пятніцу, 27 снежня, паведамляе Reuters.

Ён таксама падкрэсліў, што расейскія і паўночнакарэйскія ваенныя лідары ставяцца да такіх салдатаў як да аднаразовага матэрыялу.

«Відавочна, што расейскія і паўночнакарэйскія ваенныя лідары ставяцца да гэтых войскаў як да аднаразовага матэрыялу і аддаюць ім загады аб безнадзейных атаках на ўкраінскую абарону», – сказаў Кірбі.

Кірбі сказаў, што прэзідэнт Джо Байдэн, хутчэй за ўсё, ухваліць яшчэ адзін пакет дапамогі ў сферы бяспекі для Украіны ў найбліжэйшыя дні.