Расейцы кінуліся купляць Біблію на фоне вайны і эканамічных цяжкасцяў
- 4.12.2024, 12:03
Попыт на рэлігійныя кнігі рэзка вырас.
У Расеі рэзка павялічыўся попыт на Біблію: па выніках першых трох кварталаў 2024 года продажы рэлігійных кніг у розных выданнях выраслі ў штуках на 52% год да года, паведамілі РБК у найбуйнейшай расейскай кніжнай сетцы “Чытай-горад”.
З яе звестак, найбольшую цікавасць пакупнікі праяўляюць да Бібліі ў Сінадальным перакладзе 1876 года. Продажы гэтай версіі кнігі ў студзені-верасні гэтага года павялічыліся на 38% у параўнанні з аналагічным перыядам 2023-га і ўдвая - ў параўнанні з 2022-м. Агулам за год у "Чытай-горадзе" разлічваюць прадаць больш за 50 тысяч выданняў Бібліі.
Рост продажаў Бібліі ў натуральным вылічэнні фіксуе і маркетплэйс Wildberries. Са студзеня да лістапада 2024 года пакупак стала амаль у 2,2 разы больш, чым за той жа перыяд год таму. Пры гэтым у 2023 годзе рост да 2022-га складаў 94%. Продажы Евангелля на Wildberries таксама выраслі на 46%.
З іншых рэлігійных выданняў часцей за ўсё расейцы купляюць Новы Запавет, адзначаюць у "Чытай-горадзе". У параўнанні са Старым Запаветам попыт на яго ўдвая вышэйшы. У выдавецтве "Бамбора" (уваходзіць у выдавецкі холдынг "Эксма-АСТ") заявілі аб павелічэнні продажаў рэлігійнай літаратуры ў студзені-верасні ў штуках на 73% год да года. Часцей за ўсё пакупнікі набываюць такія кнігі, як “Дзецям пра Бога. Простыя адказы”, “Сіла жаночай малітвы. Духоўнае жыццё жанчыны” і “Першыя крокі да Бога”.
Растуць продажы літаратуры ў рэлігіі і тэалогіі і ў “АСТ-нонфікшн”. Па выніках трох кварталаў рост год да года склаў 34 адсоткі ў штуках. Высокім попытам карыстаюцца таксама выданні “Біблія з ілюстрацыямі Гюстава Доры”, “Біблія. Стары і Новы запавет”, а таксама “Каран. Прачытанне сэнсаў».
Яшчэ ў перыяд з 2019 да 2021 год у выдавецкім холдынгу “Эксма-АСТ” (уключае “Эксма”, АСТ, “Азбука-Атыкус”, “Ман, Іваноў і Фербер” і інш.) фіксавалі зніжэнне продажаў рэлігійнай літаратуры на 20–30 %. Аднак пасля пачатку вайны ва Украіне расейцы праяўляюць "стабільна высокую цікавасць" да гэтага сегменту, адзначылі ў холдынгу.
У 2023 годзе кіраўнік выдавецтва "Эксмо" Яўген Кап'ёў сцвярджаў, што новы трэнд прыйшоў следам за ростам продажаў карт Таро і кніг а эзатэрыкі. Ён тлумачыў яго "высокай ступенню нявызначанасці ў свеце".
Ва ўмовах нестабільнасці ў эканоміцы і глабальных перамен "многія знаходзяць суцяшэнне і падтрымку ў веры, імкнуцца ўзняць глыбінныя сэнсы жыцця і здабыць унутраную гармонію", растлумачылі ў "Эксма-АСТ". Насычаны парадак навін "заахвочвае многіх звяртацца да кніг у пошуках спосабаў справіцца з трывогай, усвядоміць значнасць свайго жыцця", дадалі ў холдынгу.