У самалёта «Белавія» ў небе пачаліся праблемы з рухавіком

• 5.12.2024, 18:45

Ён вярнуўся ў Менск.

Самалёт “Белавія", які ляцеў у Дамадзедава (Масква, Расея), вымушана вярнуўся ў аэрапорт Менска праз праблемы з рухавіком. Пра гэта паведаміў тэлеграм-канал пра авіяздарэнні AVIAINCIDENT. Паведамленне пацвярджаецца звесткамі сэрвісу Flightradar.

Інцыдэнт адбыўся ўвечары 4 снежня. Мяркуючы з раскладу на сайце менскага аэрапорта, борт павінен быў вылецець а 20.20, аднак час перанеслі на 21.10.

Як відаць на графіцы Flightradar, самалёт перасёк Расейскую паветраную прастору, але за Смаленскам змяніў курс і вярнуўся ў Менск.

Як піша AVIAINCIDENT, на ўсход ад расейскага горада Вязьмы на эшалоне 270 экіпаж паведаміў “аб праблеме з рухавіком" і прыняў пастанову вярнуцца на аэрадром вылету.

Пасадка ў Менску прайшла ў штатным рэжыме.