У Барсэлоне кватэру беларусаў захапілі сквотэры
- 26.02.2024, 9:26
А беларусаў яшчэ і арыштавалі.
У гішпанскай Барсэлоне кватэру двух братоў-беларусаў захапілі сквотэры, а калі нашыя суайчыннікі выселілі іх сілай, то былі арыштаваныя паліцыяй, а «захопнікі» тым часам вярнуліся ў іх жыллё. Такую гісторыю распавёў 25 лютага вядомы брытанскі таблоід Daily Mail, а крыху раней, 15 лютага, распавяла гішпанская газета для экспатаў Olive Press, звярнуў увагу сайт "Беларусь и мир".
Як пішуць выданні, Сяргей і Алег жывуць у Барселоне з 2015 года. Яны валодаюць дзвюма кватэрамі ў адным і тым жа шматкватэрным доме ў гарадскім раёне Эль Раваль. Адну з іх, Алега, 31 снежня 2023 года занялі сквотэры. Так называюць людзей, якія незаконна засяляюцца ў чужое жыллё і адмаўляюцца сыходзіць.
Сквотынг - з'ява нярэдкая для Гішпаніі. Рэч у тым, што згодна з мясцовымі законамі грамадзяне, якія занялі чужое жыллё на перыяд больш за 48 гадзін і не маюць іншай нармальнай жылплошчы, не могуць быць выгнаныя адтуль без пастановы суда. А сам судовы працэс можа зацягнуцца на шмат месяцаў і запатрабаваць значных выдаткаў.
Асабліва распаўсюджаныя такія разгляды ў сферы здачы/арэндавання кватэр, калі жыхар пасля заканчэння тэрміну дамовы аб арэндзе не вызваляе плошчу.
Тым не менш, Сяргей і Алег сцвярджаюць, што ніколі раней не бачылі людзей, якія пасяліліся ў іх кватэры, не кажучы ўжо пра нейкія дамоўныя стасункі.
Зразумеўшы, што жыллё захоплена, беларусы патэлефанавалі ў паліцыю. Тады сквотэры паабяцалі, што заўтра пакінуць кватэру. Аднак назаўтра, са слоў нашых суайчыннікаў, "захопнікі" атакавалі іх на лесвічнай пляцоўцы, узброіўшыся нажамі. Для Алега гэта скончылася невялікім парэзам на шчацэ і зламаным носам.
Са слоў братоў, праваахоўнікі параілі ім звярнуцца ў паліцэйскі ўчастак і падаць адпаведную заяву. А тым часам няпрошаныя жыхары ўжо паспелі замяніць уваходныя дзверы ў жыллё дзвярыма ваннага пакоя, таму ключы сапраўдных уладальнікаў маёмасці сталі бескарысныя.
Праз тыдзень, 15 студзеня 2024 года, нашы суайчыннікі, якія пражывалі ўвесь гэты час у Сяргея, злавілі момант, калі сквотэры выйшлі, і вярнулі кантроль над кватэрай, у сваю чаргу таксама памяняўшы замок.
Аднак неўзабаве, як апавядаюць брацца, прыехалі вартавыя парадку, якія ўвайшлі ў жыллё і, нягледзячы на запэўненні нашых суайчыннікаў, што яны з'яўляюцца ўласнікамі, на што ёсць усе дакументы, затрымалі іх. "Захопнікам" жа дапамаглі вярнуцца назад у кватэру.
Паводле інфармацыі, атрыманай выданнямі, беларусаў арыштавалі за "ўваход у памяшканне пацярпелых без іх згоды, пагрозы пацярпелым, змену замкоў і нанясенне шкоды", а таксама за "ўзяцце правасуддзя ў свае рукі". Аднаму са сквотэраў нібыта была нанесеная лёгкая траўма малатком - абвінавачанне, якое Алег і Сяргей адпрэчваюць.
Таксама журналістам растлумачылі, што ў гэтым выпадку патрулю наогул было не важна, хто менавіта ўласнік жылля: высвятляць гэта - справа суда, а не паліцыі.
Браты прабылі за кратамі два дні, пасля чаго вярнуліся ў кватэру Сяргея. Чым скончыцца гісторыя з іх затрыманнем, пакуль незразумела. Пішуць, што ім можа пагражаць турма. Тым часам "захопнікі" ўжо амаль два месяцы працягваюць заставацца ў апартаментах Алега.
І, як кажуць беларусы, усялякія спробы вярнуць плошчу не мелі поспеху - з іх сцвярджэння, сквотэры пагражаюць нажамі, а шматлікія званкі па экстраным нумары не прывялі да арышту ніводнага з няпрошаных жыхароў.